Пред Самитот на ЕУ: Сè уште без напредок во преговорите за трговски договор меѓу В. Британија и ЕУ по Брегзит
Европските лидери ќе објават дека не е постигнат успех во преговорите за трговски договор меѓу Велика Британија и Европската Унија (ЕУ) по Брегзит, јави „Блумберг“ од каде го цитираат нацрт-документот што е подготвен за дводневниот Самит в четврток и петок.
На состанокот ќе биде објавено дека сè уште нема напредок по клучните прашања во разговорите и од шефот на преговарачкиот тим на ЕУ за Брегзит, Мишел Барние, ќе биде побарано засилување на преговорите за постигнување на договор што би бил спроведлив од 1 јануари во 2021 година.
Велика Британија ја напушти ЕУ на 31 јануари и ќе ги напушти единствениот пазар и царинската унија на 31 декември по 11-месечен транзициски период. Двете страни сè уште не можат да се договорат за неколку клучни прашања како целосно спроведување на договорот, правила за фер и правична конкуренција и правила за пристап до вода и риболов.
Доколку двете страни немаат трговски договор, трговијата меѓу нив ќе се одвива според правилата на Светската трговска организација (СТО), што може да доведе до големи економски и транспортни проблеми.