В.Д. директорот на ЈП Улици и патишта Борис Настов поднесе оставка до градоначалничката Данела Арсовска и се заблагодари на следбениците на Фејсбук за довербата и поддршката што му била дадена за да раководи со ЈП Улици и патишта.

-Пред 9 месеци, кога станав в.д. Директор на ЈП Улици и патишта, затекнав претпријатие во многу лоша состојба, како финансиски, така и во однос на реализацијата на проектите. Во изминатиот период работев напорно заедно со моите соработници, наспроти сите предизвици и проблеми, за да се подобри работењето на претпријатието, а во функција на исполнување на очекувањата на граѓаните. Мојата мотивација во работата беше реализација на проектите кои им ги ветивме на граѓаните на Град Скопје. Иако преку спроведните проекти и воспоставените добри практики во работењето на претпријатието многу работи се подобрија, реализацијата на проектите не се одвиваше според моите и очекувањата на граѓаните. Затоа, ве известувам дека давам неотповиклива оставка на местото в.д. директор на ЈП Улици и патишта. Оваа моја одлука ја донесов како резултат на неадекватната комуникација со Градоначалничката на Градот Скопје, како основач на Претпријатието, како и немањето на разбирање при реализаиција на клучните проекти од интерес на Градот, а за кои јавното претпријатие имаше можност и потенцијал. Неможноста и покрај сите мои искрени намери и напори да воспоставиме меѓусебно разбирање, соработка и почитување како неопходни фактори за успешна имплеметација на зацртаните проекти и активности на претпријатието, придонесоа кон донесување на оваа моја одлука, напиша Борис Настов на својот профил на Фејбук.

Тој искрено им се заблагодари на сите вработени и соработници во претпријатието кои работеа деноноќно на сите проекти и покрај отежнатите услови на функционирање, како што рече „секогаш исполнувајќи ги задачите на највисоко професионално ниво“.

Денеска оставка даде и директорот на ЈСП Турс Филип Велкоски како и директорот на ЈП Лајка Воислав Димитровски, а пред нив оваа седмица и директорите на ЈП Градски паркинг и ЈП Дрисла, Бојан Христовски и Јане Мицевски, а Арсовска ги разреши директорот на Водовод Златко Перински и секретарот на Град Скопје Ѓоко Велковски.