Првиот човек на Џенова во интервјуто за „Гаѕета дело Спорт“, Енрико Прециози зборуваше за статусите на дел од играчите во својот клуб.

Договорот на македонскиот репрезентативец Горан Пандев со италијанската екипа истекува на 30 јуни, но се очекува до крајот на сезоната да биде дел од составот на Давиде Никола за преостанатите натпревари во Серија А.

И натаму нема никакви најави за продолжување на договорот на нашиот напаѓач, но според расположението на претседателот на клубот, можно е и следната сезона да го гледаме нашиот играч во дресот на Џенова.

И на 36 години блеска Македонецот, сезонава моментно е најдобриот стрелец Џенова со седум голови (во првенството), заедно со Кришито.

– Во последниот натпревар му реков: Дали сакаш да играш на Европското првенство? Тогаш, остани тука онолку колку што сакаш. Пандев е еден од најсериозните играчи што сум го сретнал. Јас сум многу приврзан со него. Тој остава неизбришлив белег врз нас – рече Прециози.

Пандев со македонската репрезентација е на само две победи од прв историски пласман на Европско првенство, па за очекување да ја одржи натпреварувачката форма пред важните натпревари.