„Одлуката на Европската Унија да не ги отвори пристапните преговори со Северна Македонија и Албанија е катастрофална“.

Ова го изјави Волфганг Ишингер, претседател на Минхенската конференција за безбедност и германски дипломати со долгогодишно искуство, пренесе „Б92“.

– Политичките трошоци на оваа одлука веќе се очигледни – Северна Македонија се соочува со политичка криза и можна е долгорочна дестабилизација. Останатите држави од Западен Балкан ќе заклучат: Не можеме да се потпреме на ЕУ, па дури и ако се вклучиме во тешките реформи, ќе останеме Европјани од втор ред – рече Ишингер за „Политико“.

Тој смета дека празнината која ЕУ на тој начин ја отворила нема да остане неисполнета и дека истата се подготвени да ја „исполнат“ Русија, Кина, а особено Турција.

– Мала е веројатноста дека тоа ќе послужи за поголемите цели на демократијата, мирот и стабилноста во непосредносто соседство на ЕУ – вели германскиот дипломат, а пренесува „Блиц“.

Тој како најголема препрека на патот кон трајниот евроатланстки безбедносен поредок ги наведе „темната состојба со Русија“.

– Штета што визијата за „заеднички европски дом“, која ја изрази поранешниот советски претседател Михаил Горбачов, никогаш не се оствари – дом за сите, вклучувајќи ја и Русија. Сосема спротивно: Со руската анексија на Крим и нејзината интервенција во источна Украина, оваа перспектива уште повеќе се намали – смета Ишингер.