Дел од забелешките искажани на вчерашната јавна расправа за Законот за јавно обвинителство ќе бидат имплементирани во законскиот текст – дознава „Слободен печат“ од извори во Министертсвото за правда. Тоа го очекуваат и од опозициската партија.

– По вчерашната јавна расправа за Законот за јавното обвинителство на Комисијата за политички систем, ВМРО-ДПМНЕ очекува постоечкиот законски текст да се врати во работната група за да ги вметне забелешките на експертите – велат од партијата.

Од таму се повикуваат на експертските ставови на професорите Гордан Калајџиев, Татјана Каракамишева, Гордана Силјановска – Давкова и Слаѓана Тасева кои вчера посочија дека текстот на предлог законот има бројни недостатоци и недоречености и како таков треба да се врати назад во работната група.

– Ние се согласуваме со забелешките изнесени од стручната јавност и предлагаме тие да бидат вградени во постоечкиот текст на Законот за јавното обвинителство – велат високи партиски извори на ВМРО-ДПМНЕ.

Од пратеничката група на ВМРО-ДПМНЕ посочуваат дека токму затоа и не земале учество во вчерашната јавна расправа, за јавноста да не добие впечаток дека тие како опозиција наоѓале недостатоци. На министерката за правда ѝ порачаа дека би било добро да ја послуша стручната јавност бидејќи тие биле „еднакви со неа“, и го кажале она што долго време и го укажувале и многу други.

Министерката за правда Рената Дескоска на фејсбук најави „закон на повидок“. Во говорот пред пратениците таа наведе дека Законот за јавното обвинителство е изготвен од работна група составена од домашни и странски експерти и е заснован врз меѓународни документи од држави со уредување слично на нашето. Основните начела по кои се водеше работната група е за воспоставување на Јавно обвинителство кое ќе обезбеди ефикасна и независна правда.

Професорката по уставно право Гордана Силјановска – Давкова, смета дека законот треба да се даде на разгледување на Венецијанската комисија и дека не може да се носи по скратена постапка. Според академик Владо Камбовски, кој е и претседател на Комисијата за изработка на Законот за јавното обвинителство Собранието се наоѓа во позицијаа кога мора да го донесе овој закон, дури и по цена изборите да бидат одложени за еден месец. Професорот Гордан Калајџиев, пак, оцени дека во законот не е имплементирана европската регулатива.

Најголемите стручни забелешки сепак беа дека со законот има повластени обвинители, се крши принципот на еднаквост во службата, дека е нарушен принципот на стварна и месна надлежност, дека не смеат да бидат префрлани предметите на СЈО во Јавното обвинителство. Јавниот обвинител Љубомир Јовески вчера рече дека законот е добар и дека со него се гарантира изборот на обвинители да оди преку советот на обвинители, наместо партиите да ги избираат обвинители.

И додека експертите и пратенците дебатираат за законот, амбасадорите на САД, Германија и Италија испратија апел законот да се донесе, а политичките партии да ги надимнат партиските интереси. Амбасадорката на САД Кети Мари Брнз, рече дека граѓаните очекуваат и заслужуваат да видат, дека оние што ја злоупотебиле јавната доверба ќе одговараат и дека правдата е еднаква за сите. Но и дека Законот ќе биде клучен за Македонија да покаже посветеност за членството во ЕУ.

Амбасадорите на Италија и Германија, Карло Ромео и Томас Герберих исто така испратија пораки да се продолжи со реформите во судството и борбата против корупцијата. Шефот на Делегацијата на ЕУ, Самуел Жбогар, изрази надеж дека нов закон за јавното обвинителство ќе биде усвоен пред распуштањето на Собранието. Притоа, Жбогар рече дека „предлог-законот што е на маса претставува добра основа за носење консензуална одлука“.