Управата на Барселона по вчерашниот пораз на тимот од Рајо Ваљекано, веднаш ја започна потрагата по новиот тренер бидејќи Роналд Куман експресно доби отказ.

Серијата од два порази по ред, од Реал Мадрид и Рајо Ваљекано, како и лошите игри од почетокот на сезоната му пресудија на Куман, ја оставија управата на Барселона без избор, му врачи отказ на Куман и притоа ќе мора да му исплати и 12 милиони евра како обесштетување.

Веднаш по отказот на Куман, започна лицитацијата за неговата замена и кај сите, медиумите, навивачите и управата, едно име е фаворит – легендарниот капитен Чави Ернандез.
Чави веќе шест години е дел од катарскиот Ал Сад, првите три години како играч, а последните три како тренер и има голем успех освојувајќи седум трофеи и моментно се наоѓа во серија од 34 натпревари без пораз.

Иако катарката лига не е една од најквалитетните, управата на Барселона предводена од претседателот Жоан Лапорта смета дека Чави е идеален тренер за каталонскиот тим бидејќи ја познава филозофијата на игра, а и ќе претставува авторитет во соблекувалната.

Наводно, Чави дал зелено светло, односно е подготвен да седне на клупата на Барселона.
Додека Барселона се договори со актуелниот тим на Чави, Ал Сад, каталонскиот тим најверојатно ќе го предводи Серхи Бархуан, актуелниот тренер на Б тимот на Барселона.