Првиот светски тенисер, Новак Ѓоковиќ е последен полуфиналист во машка конкуренција на Мастерс турнирот во Синсинати, откако во четвртфиналето го совлада Лука Пуи во два сета и тоа со 7:6, 6:1. Иако релативно лесно го совлада францускиот тенисер, Ѓоковиќ ги загрижи фановите со тоа што побара лекарска интервенција за да го масира лакотот.

– Не знам, ќе видиме што ќе биде со лакотот. Бев помалку вкочен, посебно на сервисот но успеав да го завршам дуелот, што е одлично за мене. Но болката сè уште е присутна, се надевам дека до полуфиналниот дуел, таа ќе исчезне – изјави Ѓоковиќ.

Негов противник во полуфиналето ќе биде Русинот Данил Медведев кој минатата недела играше во финалето на Мастерс турнирот во Монтреал. Медведев во четвртфиналето релативно лесно со 6:2,6:3, го совлада сонародникот Андреј Рубљов кој пак во претходното коло направи сензација со елиминацијата на Рожер Федерер.

Во второто полуфинале ќе играат  Ришар Гаске и Даниел Гофан. Гаске во три сета, 7:6, 3:6, 6:2, го совлада Роберто Баутиста Агут и за прв пат од 2013 година обезбеди пласман во полуфиналето на еден Мастерс турнир. Гофан пласманот помеѓу најдобрите четворица теисери во Синсинати го обезбеди без борба бидејќи Јошихито Нишиока се повлече од турирот поради вирус.