Пожарот што избувна во готската катедрала во францускиот град Нант денеска е под контрола, соопштија официјални лица.

Според нив, штетата не е споредлива со минатогодишниот пожар во катедралата Нотр-Дам во Париз.

– Штета е направена на органата што се чини дека е целосно уништена. Платформата е многу нестабилна и може да пропадне, изјави регионалниот пожарникарски началник Лорен Ферлеј, на брифинг пред катедралата.

Катедралата Свети Петар и Павле во Нант е една од најголемите готски катедрали во Франција. Нејзината изградба започнала во 1434 година и траела 457 години – до 1891 година.

Пожарот избувнал во внатрешноста на готскиот објект и пожарникарите биле повикани набргу по 7.30 часот. Екипа од 70 пожарникари беше испратена на местото на пожарот.

Катедралата Свети Петар и Свети Павле во Нант беше зафатена со оган во 1972 година. Тогаш беше оштетен дел од покривот, а пожарникарите го локализираа пожарот по пет часа.

Таа катедрала е исто така и седиште на епархијата во Нант. Прогласена е за историски споменик во 1862 година.