Општина Карпош започнува со акција за уредување и оградување на опожарениот потег долж кејот на Вардар, како и на други, покритични делови во овој дел од општината, во рамки на општинските надлежности и земајќи ја предвид сопственоста на земјиштето.

Од општината велат дека досега барале посериозна поддршка и механизација за целосно чистење на овие депонии, а самостојно ја затвориле депонијата кај мостот „Газела“.

Исто така од општината соопштија дека по утврдената фактичка состојба на терен и контактите со противпожарните служби, очигледно е дека пожарот е намерно подметнат на 5 – 6 места истовремено.

Оттаму изразуваат благодарност до фирмите: „Анизор“, „Гранит“, како и до ЈП Улици и патишта и Противпожарната бригада за вчерашната акција за гаснење на пожарот долж Кејот на Вардар, во близина на Спортскиот центар „Борис Трајковски“. До доцните вечерни часови, овие субјекти ревносно се бореле со пожарот, со цел да се локализира, и истиот да биде ставен под контрола.

Во текот на следната недела Општината ќе објави јавен повик до јавните претпријатија, како и до општествено одговорни субјекти и градежни компании, да се приклучат кон целосно чистење на депониите долж кејот на Вардар. 

Моментално, на кејот на Вардар сè уште има мобилни екипи од општината, противпожарната служба и дел од јавните претпријатија, со цел да ги изгаснат малите пламени кои уште тлеат на оваа површина.