Вчера вечерта во скопската населба Дебар Маало што се наоѓа во општината Центар падна дрво при што повреди дете и оштети паркиран автомобил.

Како што јави 360 степени, градоначалникот на Општина Центар, Саша Богдановиќ, изјавил дека детето кое се наоѓало во близина на автомобилот врз кој падна дрвото, има само гребаници и не е сериозно повредено

Инцидентот се случил во близина на влезот на основното училиште „Коле Неделковски“.

Богдановиќ вели дека дрвото паднало поради исушените корени, исто како дрвото кое пред неколку дена падна на улицата „Орце Николов“ во Центар.

„Дрвото паднало само од себе. Било со зелени гранки, но со исушени корени, практично, без корени. Паднало и оштетило едно возило. Дојде полиција и направи записник. Ќе треба да се плати отштета за автомобилот. Детенцето било малку изгребано, тоа било во близина на автомобилот“, вели Богдановиќ за 360 степени.