Повредата сепак е посилна од Маркез, пол позицијата на Квартараро
Возачот на Петронас Јамаха, Фабио Квартараро ќе стартува од пол позицијата на трката за Големата награда на Андалузија во втората трка од Мото ГП шампионатот на која сепак нема да вози Марк Маркез.
Актуелниот шампион во Мото ГП класата, Марк Маркез, се откажа од утрешната трка на патеката Херез. Шпанецот на првата трка која исто така се возеше во Херез падна и ја скрши надлактичната коска, а во вторникот му беше извршена операција. Маркез се појави на квалификациите, успеа да го помине првиот круг, а потоа поради големи болки се откажа, а во исто време се откажа и од утрешната трка.
Маркез се очекува да се врати на трката во Чешка која ќе се вози за две недели.
На утрешната трка од пол позицијата ќе стартува Фабио Квартараро кој минатиот викенд дојде до првата победа во Мото ГП класата. Тој беше најдобар во квалификациите и до втората пол позиција едноподруго дојде со време со 1:37.007 минути. Веднаш до него ќе биде возачот на фабричката Јамаха, Маверик Вињалес, додека трет е Франческо Бањаја на Прамак Дукати.
Трката за ГН на Андалузија во Мото ГП класата ќе се вози утре, а стартот е закажан за 14. часот.