ПОТРЕСНО СВЕДОШТВО: Од автомобилот се слушаше гласна музика и кашлање
Кошаркарот на Црвена звезда и српски репрезентативец, Огњен Кузмиќ, е тешко повреден во сообраќајната несреќа која се случи сабајлево на магистралниот пат Приједор – Бања Лука. Несреќата се случи кога возилото „Порше“ во кое беа Кузмиќ и пријателот Богдан Илиќ, се удри во возило „БМВ“ во кое беше уште еден спортист, боксерот Дражен Јањанин со пријателот Марко Мијатовиќ.
По сударот и двете возила се превртеа со тоа што „Поршето“ во кое беа Кузмиќ и Илиќ беше целосно уништено и излета од патот.
Боксерот Јањанин, за „Српскаинфо“ објасни како дојде до сударот во кој најтешко помина Кузмиќ.
– Се враќав од бокс меч од Минхен и Мијатовиќ со мојот автомобил дојде да ме земе во Бања Лука. Се наоѓавме во Рамиќ околу пет часот кога по кривината пред нашите очи се појави светло. Автомобил со голема брзина одеше од обратна насока и одеднаш влезе во нашата лента на движење. Мијатовиќ брзо реагираше и го сврте автомобилот на страна, ние удривме во заштитната ограда. Меѓутоа автомобил „Порше“ удри во нашиот заден крај на автомобилот, ја откина вратата и тркалото на нашето возило – вели Јањанин кој додаде дека возилото од силината на ударот се преврте, додека вториот автомобил застанал дури 200 метри подалеку.
– Го скршив прозорот и го извлеков пријателот надвор од автомобилот. Веднаш потрчавме кај вториот автомобил кој беше излетан од патот и од него се слушаше гласна музика и како некој кашла. Набрзо дојдоа пожарникарите и ги извлекоа од возилото. Ние добро поминавме но слушнав дека Кузмиќ и неговиот пријател се во тешка состојба и се молиме за нивното здравје – изјави Јањанин.