Акциите на најголемата германска банка, „Дојче банк“ загубија голем дел од вредноста денеска, во исто време додека трошоците за осигурување поради неисполнување на обврските нагло пораснаа, бидејќи германскиот заемодавач се најде на мета на панично продавање поради грижите за стабилноста на европскиот банкарски сектор, јавија медиумите.

На многумина од аналитичарите не им е јасно зошто банката, која во десет последователни квартали има остварено добивка и има силна капитална и солвентна позиција, стана цел на пазарот, кој по сѐ изгледа е во режим на „барај и уништи“.

Итното спасување на „Кредит Свис“ од страна на УБС, по колапсот на американската банка „Силиконска долина“, предизвика загриженост кај инвеститорите, која беше продлабочена со дополнителното заострување на монетарната политика од страна на Федералните резерви на САД во средата, пишува „Си-ен-би-си“.

Централните банки и регулаторите се надеваа дека договорот за спасување на Кредит Свис, постигнат со посредство на швајцарските власти, ќе помогне да се смири нервозата на инвеститорите за стабилноста на европските банки.

Но, колапсот на 167-годишната швајцарска институција и промената на правилата на хиерархијата на доверителите за да се избришат дополнителните обврзници на Кредит Свис од 16 милијарди швајцарски франци (17,4 милијарди долари) го оставија пазарот неубеден дека договорот е доволен, да ги задржи стресовите во секторот.

Во последниве години, Дојче банк претрпе реструктуирање од повеќе милијарди евра со цел да ги намали трошоците и да ја зголеми профитабилноста. Заемодавачот забележа годишен нето приход од 5 милијарди евра (5,4 милијарди долари) во 2022 година, што е зголемување за 159% на годишно ниво.

Нејзиниот коефициент CET1 – мерка за солвентноста на банката – беше 13,4% на крајот на 2022 година, додека стапката на покривање на ликвидноста беше 142% и нејзиниот нето стабилен коефициент на финансирање беше 119%. Овие бројки не би значеле дека постои причина за загриженост за солвентноста или ликвидносната позиција на банката.

Германскиот канцелар Олаф Шолц на прес-конференција во петокот во Брисел изјави дека Дојче банк „темелно го реорганизирала и модернизираше својот деловен модел и е многу профитабилна банка“, додавајќи дека нема основа за шпекулации за нејзината иднина.

Некои од грижите околу Дојче Банк се фокусираа на нејзината изложеност на комерцијални недвижности во САД и нејзините значителни деривати.

Сепак, истражувачката компанија Autonomous, подружница на AllianceBernstein, во петокот ги отфрли овие грижи како „добро познати“ и „само не многу страшни“, укажувајќи на „силната позиција на капитал и ликвидност на банката“.

„Нашиот рејтинг за слаби перформанси на акциите е едноставно поттикнат од нашиот став дека има поатрактивни приказни за акции на друго место во секторот (т.е. релативна вредност)“, велат во истражувачката белешка, стратезите на „Autonomous Research“, Стјуарт Греам и Леона Ли.

„Немаме загриженост за одржливоста на Дојче или за вредноста на средствата. Да бидеме кристално јасни – Дојче НЕ е следниот Кредит Свис“, велат тие.

За разлика од оштетениот швајцарски заемодавач, тие забележаа дека Дојче Банк е „солидно профитабилна“ и Autonomous проектира поврат на материјалната книговодствена вредност од 7,1% за 2023 година, што ќе се зголеми на 8,5% до 2025 година.