Постхумно е објавен романот „Еден сив мартовски ден“ од Тања Урошевиќ
Издавачката куќа „Или-Или“ ја објави книгата „Еден сив мартовски ден“ од Тања Урошевиќ (1936-2020), како 198. издание во едицијата „ПРОаЗА“.
Романот е најден во оставината на писателката, завршен и подготвен за печат. Пишуван е од почетокот на 2017 до почетокот на 2020 година, а издаден со финансиска поддршка од Министерство за култура.
„Еден сив мартовски ден“ е класичен психолошки роман, со интроспекции и ретроспекции, богат со детали од секојдневниот градски живот. Дејството на романот се одигрува главно во Скопје, во периодот на крајот од 40-тите, па сѐ до крајот на шеесеттите години од 20 век.
Тања Урошевиќ беше писателка и преведувачка. Авторка е на романите „Аквамарин“ (2004) и „Превид“ (2008), на збирките раскази „Црвена нишка – железен прстен“ (2009) и „Три новели“ (2017), на повеста „Ура, Арал!“ (2019) и на подолгиот расказ „Размена на пораки“ (2013) во истоимената книга објавена заедно со Влада Урошевиќ.
(Текстот е објавен во „Културен печат“ број 104, во печатеното издание на весникот „Слободен печат“ на 6-7 ноември 2021)