Пост корона ТВ договор: Бундеслигашите покуси за 200 милиони евра
Најавите дека пандемијата на коронавирусот ќе се одразат и на спортот преку намалување на договорите за ТВ правата, почнаа да се остваруваат и први кои се најдоа на удар се бундеслигашите.
Бундеслигата е првата европска лига која по пандемијата на коронавирусот ги продаде ТВ правата. Телевизијата Скај и интернет платформата Дазн во наредните четири години ќе платат 4.4 милијарди евра за преноси на натпреварите од Бундеслигата и од втората лига.
Ова сума е за 200 милиони евра помала од претходниот договор кој истекува на лето, но треба да се напомене дека оваа сума е само за преноси на териториите на Германија, Швајцарија и Австрија.
Со новиот договор Скај ќе ги пренесува сите натпревари кои ќе се играат во саботите, околу 200 по сезона, додека Дазн ќе ги има екслузивните права за 106 натпревари по сезона и тоа за средбите кои се играат во петок и недела.