После Ѓоковиќ, и Надал го откажа учеството во Монтреал
Новак Ѓоковиќ мораше да се повлече бидејќи на невакцинирани од странство им е забранет влез во Канада, а Шпанецот Рафаел Надал мораше да се повлече од здравствени причини.
Најпрвин Србинот Ѓоковиќ се повлече од Мастерсот во Монтреал, а денеска истата одлука ја донесе и Надал.
– Од мојот одмор и доцното враќање на тренинзите, сè добро поминуваше овие недели. Пред четири дена повторно почнав да тренирам и по тренингот имав мала непријатност што беше присутна и денеска. Решивме да не патуваме во Монтреал и да продолжиме да тренираме без форсирање. Искрено му благодарам на директорот на турнирот на Јуџин и на целиот негов тим за разбирањето и поддршката што отсекогаш ми ја покажуваа, а ниту денешниот ден не беше исклучок.
Се надевам дека повторно ќе играм во Монтреал, турнир кој го сакам и кој петпати сум го освоил пред публиката која секогаш ме дочекувала со голема љубов. Немам друг избор освен да бидам мудар во овој момент и да размислувам за здравјето – објави Надал на „Твитер“.
Рафа сака целосно да се опорави пред почетокот на „УС Опен“, кој ќе започне на 29 август и ќе трае до 11 септември. Со оглед на тоа дека шансите на Ѓоковиќ за настап во Њујорк не се големи, Надал ќе биде прв фаворит на последниот Грен слем во сезоната. Шпанецот ги освои воведните два во Мелбурн и Париз, додека Ѓоковиќ беше најдобар на Вимблдон оваа сезона.