Посадиле 2 милиони стебла и го оживеале екосистемот
Бразилскиот фотограф Себастиао Салгадо и неговата сопруга Лелиа Делуиз Ваник не можеле да се помират дека еден дел од Атлантската шума е оголен со непланското сечење.
Тие одлучиле да покажат што може да направи мала група луѓе, а денес, 20 години подоцна, имаат со што да се пофалат.
Овој бразилски пар посадил 2 милиони стебла!
Салгадо се вратил во родниот Бразил во 90-тите години по исклучлително напорниот престој во Африка и фотографирањето на ужасите на геноцидот во Руанда.
Меѓутоа, тоа што го затекнал многу го повредило. Големите подрачја на Атлантската шума биле оголени и пусти. Голем дел од некогаш виталната прашума биле уништени.
Салгадо одлучил заедно со својата сопруга да спаси барем дел од грандиозната прашума.
„Земјата беше болна. Сè беше уништено. Само околу 0,5 проценти беше под шума. Тогаш мојата жена предложи повторно да насадиме шума. По многу години нашиот напор вроди со плод, животните почнаа да се враќаат. Како што шумата повторно се раѓаше, и ние се препородивме заедно со неа“, рекол Салгадо за „Гардијан“.
„Само дрвјата можат да го претворат јаглеродниот диоксид во кислород. Мораме повторно да посадиме шуми. Со нив ќе се вратат и животните“, размислувал Салгадо.
Тој знаел дека при пошумувањето мора да се внимава на секое подрачје да се садат домашни сорти. По многу внимателно бирање и садење на автохтони видови, целото подрачје оживеало неверојатно брзо во наредните две децении.
Некогашната смртна тишина денес е заменета со песната на птиците, звуците на инсектите и другите животни. Вкупно 172 видови птици, 33 видови цицачи, 15 видови влекачи, 15 видови водоземци и 293 видови билки го сочинуваат богатиот екосистем на обновената шума.