Најдобриот македонски таеквондист Дејан Георгиевски доживеа елиминација на стартот од Светското првенство кое се одржува во Баку, Азербејџан.

Во пеколна конкуренција од 50 најдобри таеквондо борци од светот, од тимот на нашиот Деки се надеваа дека в недела ќе се оди до крај.

Георгиевски во категоријата +87 кг. беше слободен во првото коло, а во борбата за пласман во осминафиналето загуби од натпреварувачот од Авганистан Али Акбар Амири (2:2, 3:7).

Познати се полуфиналните парови во оваа категорија: Карлос Сансорес (Мексико) – Емре Куталмиш Атешли (Турција) и Шеик Салах Сисе (Брегот на Слоновата коска) – Пашко Божиќ (Хрватска).

Во женска конкуренција настапи македонската таеквондистка Мила Рељиќ во второто коло во категоријата 62 кг. загуби од светската шампионка, Русинката Лилија Кужина (4:13, 1:13) која настапи под „Индивидуален Неутрален Тим“.

Кужина подоцна го освои и златниот медал откако во финалето со 6:2 и 8:6 триумфираше над Бразилката Каролине Сантош. Во оваа категорија со бронзени медали се закитија Елија Пауел (Велика Британија) и Феруза Садикова (Узбекистан).

Следниот настап на Рељиќ ќе биде на Европските Олимписки Игри во Краков, Полска кон крајот на месецот.