Пораз на одбојкарите и во втората контрола во Софија
Одбојкарската репрезентација на Македонија го претрпе и вториот пораз на пријателскиот натпревар против Бугарија која се игра во Софија.
Идентично на вчера, избраниците на селекторот Матијашевиќ се поразени во четири сета и тоа со 25:23, 25:17, 22:25, 25:20.
Во првиот сет одлучувачкиот момент се случи во самиот финиш кога Бугарија дојдоа до 23:21 и предноста успеаја да ја задржат до крајот на сетот.
Во вториот сет, избраниците на селекторот Матијашевиќ беа рамноправни до 13:13 по што противникот со направи серија од 12:4 и го освои вториот сет. Во третиот сет, нашите одбојкари одиграа одлично и успеаја да го решат во своја корист со 25:22, но немаа сили истиот подвиг да го направат и во четвртиот сет.
Натпреварите против Бугарија во Софија беа последни контроли за македонските одбојкари кои веќе од понеделник ги очекува настапот на двата квалификациски турнири кои ќе се играат во салата „Борис Трајковски“ во Скопје. Противници на Македонија се селекциите на Турција и на БиХ, а целта е првото место во групата, додека во игра е и второто место доколку сме меѓу петте најдобри второпласирани, меѓу седумте групи.