Поранешниот шпански крал Хуан Карлос плати околу 4,4 милиони евра данок во Шпанија, во обид делумно да ги регулира претходните пропусти при плаќањето даноци, соопштија неговите правни застапници.

Адвокатот на Хуан Карлос, Хавиер Санчез Хунко, рече дека даночниот долг се однесува на плаќањата што ги изврши приватната фондација Загатка во име на поранешниот крал за „неколку патни трошоци и други услуги”.

Фондацијата со седиште во Лихтенштајн е сопственост на Алваро де Орлеанс, бизнисмен и далечен роднина на Хуан Карлос.

Орлеанс јавно призна дека финансирал некои приватни трошоци на поранешниот крал, а тој вид финансирање, според шпанскиот даночен закон, подлежи на оданочување.

Шпанскиот весник Ел Паис и порталот Ел Еспањол објавија дека фондацијата му плаќала на кралот за приватни летови повеќе од десет години, до 2018 година. Поранешниот крал поднесе барање за подмирување на даночниот долг во декември. Тој не пријавил повеќе од 500.000 евра донации, кои ги добил во периодот од 2016 до 2018 година.

Поранешниот шпански крал е поврзан со истрагите за перење пари, кои беа иницирани од швајцарски обвинител со фокус на две одделни офшор фондации, и врз основа на чии информации во јуни беше покрената истрага во Шпанија.

Поради тие истраги, Хуан Карлос ја напушти Шпанија во август минатата година