Поранешниот потпретседател на САД, Мајк Пенс, ќе се бори против Трамп за републиканската кандидатура
Поранешниот потпретседател на САД од времето кога Доналд Трамп ја водеше државата, Мајк Пенс, влегува во трката за републиканска претседателска номинација во 2024 година. Тој денеска поднел барање до Федералната изборна комисија.
63-годишниот Пенс ќе ја започне кампањата во Ајова во среда, изјавија три извори за Ројтерс минатата недела.
Пенс ќе му се спротивстави на Доналд Трамп, кому некогаш лојално му служеше, но одби да го поддржи кога поранешниот претседател се обиде да ги поништи резултатите од изборите во 2020 година.
Поранешниот конгресмен и ексгувернер на Индијана има силни конзервативни ставови за социјалните прашања, а тој сѐ повеќе се дистанцира од позициите на Трамп.
Пенс рече дека поранешниот претседател ги охрабрил бунтовниците кои го нападнаа Капитол на 6 јануари 2021 година и ги ставија во опасност него и неговото семејство.
Пенс им се придружува на сѐ поголемиот број републикански кандидати, вклучувајќи ги Трамп, гувернерот на Флорида, Рон ДеСантис, поранешниот гувернер на Њу Џерси, Крис Кристи, сенаторот Тим Скот и поранешната гувернерка на Јужна Каролина, Ники Хејли.
Гувернерот на Северна Дакота, Даг Бургум, исто така, планира да влезе во трката во среда, според лице запознаено со плановите на Бургум.