Поради него Меси си замина од Барселона, а сега го критикува ПСЖ: Тие ќе го уништат фудбалот
Првиот човек на Ла Лига, Хавиер Тебас остро ја критикуваше трансфер политиката на ПСЖ по завршувањето на летниот преоден рок.
Откако заврши еден од најлудите и најдрамитични преодни рокови за најголем дел од европските лиги, се огласи претседателот на Ла Лига, Хавиер Тебас кој го нападна ПСЖ.
Токму ПСЖ е апсолутен победник во преодниот рок во кој донесе некои од најголемите фудбалски ѕвезди. На прво место е ангажманот на Лионел Меси од Барселона која не можеше да обезбеди финансиски средства за платата на Аргентинецот.
Според правилата на Ла Лига на кои инсистираше Тебас да се почитуваат, шпанските екипи можат да потрошат само 70 проценти од годишните приходи за плати на фудбалерите, додека со Меси тој процент на каталонскиот тим изнесуваше дури 110 проценти.
Покрај Меси, како слободни играчи во ПСЖ дојдоа и Серхио Рамос од Реал Мадрид и Џанлуиџи Донарума, додека платија 110 милиони евра за Ашраф Хакими од Интер и Нуњо Мендеш кој дојде до Спортинг Лисабон, а притоа го задржаа и Килијан Мбапе иако понудата на Реал Мадрид изнесуваше неверојатни 220 милиони евра.
Los clubs-estado son tan peligrosos para el ecosistema del fútbol como la Superliga. Fuimos críticos con la Superliga porque destruye el fútbol europeo y somos igual de críticos con el PSG. Pérdidas Covid +300M; ingresos de TV en Francia -40%; ¿y +500M en salarios? Insostenible.
— Javier Tebas Medrano (@Tebasjavier) August 31, 2021
„Клубовите-држави се подеднакво опасни за фудбалскиот „екосистем“ како и Суперлигата. Бевме критични кон Суперлигата бидејќи го уништува европскиот фудбал, па сега сме подеднакво критични кон ПСЖ“, напиша Тебас на својот профил на Твитер.
За да докаже колку е апсурдна ситуацијата со ПСЖ, Тебас ги спореди трошоците на францускиот тим за плати на фудбалерите со загубите кои француската Лига 1 ги претрпе поради пандемијата на коронавирусот.
„Загуби од пандемијата на коронавирусот +300 милиони евра, приход од ТВ правата во Франција -40 проценти и 500 милиони на плати? Тоа е неодржливо“, пишува Тебас.