Мурињо седна на клупата на Тотенхем после отказот кој го доби Маурисио Покетино. Португалецот почна успешно со лондонскиот клуб со победа во Премиер лигата над Вест Хем и триумф во ЛШ над Олимпијакос.

Италијанскиот одбранбен играч кој ги брани боите на Јувентус, Леонардо Бонучи смета дека поранешниот тренер на Интер, Реал Мадрид, како и менаџер на Манчестер јунајтед и Челзи, го „препороди“ премиерлигашот кој на едно коло до крајот на групната фаза го обезбеди второто место во групата „Ц“ зад Баерн, а пред Црвена звезда и Олимпијакос.

– Доколку би морал да избрам тим за избегнување во осминафиналето, тогаш тоа е Тотенхем. Мурињо им даде нешто додатно. Може многу нешта да се променат до елиминациската фаза во февруари, но верувам дека Тотенхем ќе се врати на вистинскиот пат – рече Бонучи за „Спорт Медиасет“.

Јувентус, пак, ја потврди првата позиција во групата „Д“ со триумфот над Атлетико Мадрид и затоа ќе добие условно кажано, „полесен“ ривал во ждрепката најавена за 16 декември.

– Можеби делуваше дека е лесно, но никогаш не е. Имавме добри резултати и ја остваривме првата цел – додаде искусниот дефанзивец.