Популарноста на Ла Лига му ја донесе „Златната топка“ на Лео Меси?
Минатиот понеделник Лионел Меси по седми пат ја освои „Златната топка“ иако добар дел од поранешните фудбалери, новинари и експерти сметаат дека Аргентинецот не го заслужи признанието, а сега можеби ја најдоа и причината.
Во неизвесно гласање, Меси доби вкупно 613 поени, само 33 повеќе од напаѓачот на Баерн Минхен, Роберт Левандовски за кого многумина сметаат дека требаше да ја добие „Златната топка“, додека имаше и добар дел кои мислеа дека Жоржињо, Мохамед Салах или Карим Бензема треба да победат.
Денеска е откриено дека географијата имала големо влијание на бодувањето откако се појави мапа на светот која најдобро илустрира каде попопуларен е Меси, каде Салах, а каде Левандовски и покажува дека ТВ правата имале удел во одлуката за добитникот.
Бундеслигата во која Роберт Левандовски „царува“ неколку години не е глобално популарна како Ла Лига минатата сезона играше Меси (Барселона) и која е втора најпопуларна фудбалска лига по Премиер лигата.
Поради тоа Меси доби повеќе гласови од Левандовски од азиските и јужноамериканските новинари.
Меси доби 150 бодови од азиските новинари наспроти 107 бодови за Левандовски, а исто така голема разлика имаше и во Северна и Централна Америка од каде Аргентинецот доби 103 бодови, додека Полјакот само 63. Во Јужна Америка, Меси доби 50 бода, наспротив 23-те на Левандовски.
Напаѓачот на Баерн доби повеќе гласови од Меси во Европа (151:203) и во Африка (159:184), што беше недоволно за да ја освои „Златната топка“.