Американскиот државен секретар Мајк Помпео на денешната прес-конференција со премиерот Зоран Заев изјави дека е остварено многу од отворањето на првата канцеларија во Скопје во 1994 година.

– Сега имаме 61 американски дипломат и над 250 локални вработени. Растежот на нашиот дипломатски тим го изразува и развојот на нашето стратешко партнерство – рече Помпео.

Помпео се заблагодари за поддршката на Македонија за мисиите на НАТО и како што вели тој, „посветеноста на Северна Македонија покажува дека ќе биде добра сојузничка за САД“.

– Би сакал да го поздравам историскиот Преспански договор, како и спогодбата за пријателство меѓу Северна Македонија и Бугарија – рече американскиот државен секретар.

– Претседателот Трамп во Обединетите нации рече дека иднината им припаѓа на суверени и независни држави, коишто ги штитат своите граѓани и ги почитуваат соседите. Северна Македонија го одразува овој дух. САД ќе продолжат да бидат партнер со вас за доброто на вашите граѓани, за регионот и за светот“, рече Помпео, додавајќи државата да внимава од руско и кинеско влијание.