Полскиот премиер Матеуш Моравјецки ги повика лидерите на земјите од Европската унија, САД и Велика Британија да го посетат главниот град на Украина за да покажат солидарност, пренесува ДПА.

Во изјава за денешното издание на германскиот таблоид „Билд”, тој им порача на германскиот канцелар Олаф Шолц, францускиот претседател Емануел Макрон, американскиот претседател Џо Бајден, британскиот премиер Борис Џонсон и другите лидери да отпатуваат во Киев, да погледнат во очите на жените и децата таму и да им помогнат да ги спасат нивните животи и нивната независност.

Тој рече дека Украинците се борат за вредностите на Европа и западниот свет.

Киев е редовно гранатиран откако Русија ја започна инвазијата на Украина на 24 февруари, потсетува ДПА.

Премиерите на Полска, Чешка и Словенија во вторникот отпатуваа за Киев со воз и се сретнаа со украинскиот претседател Володимир Зеленски во знак на поддршка.