ПОЛИТИКАТА го победи ФУДБАЛОТ: Косовската полиција не ги пушти фудбалерите на Црвена звезда да влезат во Косово
Натпреварот помеѓу Трепча и Црвена звезда во рамките на 1/16 од Купот на Србија нема да се одигра,објави директорот на тимот од Косовска Митровица, Бојан Јакшиќ, што е доказ дека политиката повторно ги победи спортот и фудбалот.
Косовската полиција на граничниот премин Јариње не му дозволи на автобусот со фудбалерите на Црвена звезда да влезе во Косово. На граничниот премин се стационирани засилени сили на косовската полиција, со две возила и на специјалната полиција „Роса“.
Засега полициските екипи на Косово не му дозволуваат влез во Косово на автобусот со фудбалерите, а претходно им беше забранет влезот и на бројните новинарски екипи од Србија кои сакаа да го проследат натпреварот.
Претходно директорот на „црвено-белите“, Звездан Терзиќ потврди дека екипата има забрана за влез во Косово иако ФИФА претходно упати препорака до косовските власти да дозволат да се одигра натпреварот помеѓу Трепча и Црвена звезда.