Полициски час во Минеаполис по убиството на Афроамериканецот Рајт

Фото Миа

Во предградијата на Минеаполис е воведен полициски час поради немирите што избувнаа во неделата за време на протестот по уште едно убиство на Афроамериканец од страна на полицијата.

Дваесетгодишниот Афроамериканец Донте Рајт беше убиен во неделата откако полицијата го запре за време на рутинска контрола на возилото.

При проверката било утврдено дека е распишана потерница по него. Кога полицајка го извадила од автомобилот, обидувајќи се да му стави лисици, Рајт започнал да пружа отпор, соопштено е на прес-конференција.

Снимките од камерата што ја носела полицајката, а беа прикажани на конференцијата, покажуваат дека Рајт бил предупреден. Тој бил застрелан откако и дал отпор на полицијата и влегол во автомобилот со намера да избега. По неколку метри, Рајт со смртна прострелна рана удрил во дрво со својот автомобил и починал.

Шефот на полицијата објави дека полицајката имала намера да го активира пиштолот за зашеметување кога „случајно” го застрелала Рајт.

Поради ова убиство, граѓаните повторно излегоа на улиците на Минеаполис, градот каде минатата година беше убиен Афроамериканецот Џорџ Флојд, при брутална полициска интервенција.

За време на протестот поради убиството на Донти Рајт, дојде до конфликт меѓу демонстрантите и полицијата, која употреби солзавец за да ги растера насобраните.

По повод убиството на Рајт, се огласи и американскиот претседател Џо Бајден, кој изјави дека се случила „навистина трагична работа” и повика на истрага за инцидентот.

– Прашањето е: дали тоа било несреќен случај? Дали тоа било намерно? Тоа останува да се утврди со комплетна истрага, рече Бајден.

Тој исто така повика на мир и воздржаност, нагласувајќи дека го разбира „гневот, болката и траумата” во афроамериканската заедница.

Во Минеаполис во тек е судењето на полицаецот Дерек Шовин, кој е обвинет за убиството на Флојд. Поради тоа судење, со денови има зголемени тензии во градот, а припадниците на Националната гарда се распоредени на улиците.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот