Британската полиција денес објави дека растурила свадба со скоро 400 гости во Лондон. И покрај забраната за собирање голем број луѓе поради пандемијата ковид-19 свадбата била организирана во училишна сала во Стемфорд Хил.

За да се сокријат ги покриле прозорците, па така од надвор не се гледало што се случува внатре. Организаторот сега се соочува со парична казна од 10.000 фунти.

Според строгите мерки воведени на почетокот на годината, свадби може да се прават само во „исклучителни околности“ и дозволено е да се соберат само шест лица. 

Дневниот број на нови инфекции се намали од скоро 70 000 на 8 јануари на нешто помалку од 40 000 во последните денови, но властите се загрижени дека многумина не ги следат правилата, па вирусот продолжува да се шири.

Британскиот министер за внатрешни работи, Прити Пател, во четвртокот предупреди дека прекршувањето на правилата се казнува со парични казни и најави воведување нова парична казна од 800 фунти за присуство на домашни забави.