Полицијата „растури“ короназабава во Индија, уапсени 54 лица
Поради кршење на воведените рестрикции наметнати поради пандемијата со коронавирусот, индиската полиција уапси 54 лица на забава во државата Пенџаб, во северна Индија.
Забавата била организирана вчера на базен во еден ресторан и покрај забраната за јавни собири, а полицијата интервенираше по анонимна пријава, изјави заменик-началникот на локалната полиција, Сами Верма, јави Си-Ен-Ен.
Во Пенџаб, потврдени се 15.731 нов случај на ковид-19 и вкупно 1.739 смртни случаи за едно деноноќие.
Индија соопшти за 90.632 нови случаи на Ковид-19, што е најголемо зголемување на бројот на нови инфекции за еден ден. Вкупно 4.113.811 лица се заразени во Индија, а 70.626 лица починаа од почетокот на пандемијата.
Индија е трета во светот според бројот на заразени со вирусот, по САД и Бразил.
Според Министерството за здравство, во Индија моментално има 862.320 активни случаи на заболени со новиот коронавирус.