Поголемиот дел од руските лекари се скептични за руската вакцина
Откако заврши кратката медиумска еуфорија, руските медиуми во петокот објавија социолошко истражување што покажа дека руските лекари бараат подетални информации за вакцината против ковид што се разви во оваа земја, пред да им ја препорачаат на своите пациенти.
Во истражувањето во кое учествувале повеќе од 3.000 лекари, над 50 проценти се изјасниле дека не се согласуваат да се брза со препораките за оваа вакцина зашто им требаат повеќе податоци. Околу 25 проценти од испитаниците сметаат дека вакцинацијата е безбедна.
Причината за внимателност кај лекарите е тоа што немаат доволно информации за безбедноста и ефикасноста на вакцинацијата, а дел од лекарите биле скептични заради брзината со која што се пристапило кон развојот на вакцината.
Министерот за здравство на Русија Михаил Мурашко пак, смета дека скепсата на западните колеги е неоснована, а платформата за вакцината е добро изучена одамна зашто е правена против вирусот САРС, инаку најсличен на ковид.