Двете најголеми ѕвезди на Манчестер јунајтед ја шокираа управата со своите побарувања за да потпишат нови договори со англискиот тим.
Прв кој своите желби ѝ ги кажа на управата е Пол Погба, кој бара неделна плата од неверојатни 500.000 фунти за да потпише нов договор и се заканува со евентуален трансфер во Реал Мадрид. Тој неодамна изјави дека му е сон да игра за Зинедин Зидан во Мадрид, но веднаш потоа ретерираше во изјавата кажувајќи дека добро се чувствува и во Манчестер.

„Не е тајна дека го сакам Пол, но не можам да зборувам за евентуален трансфер. Но доколку си заминува од Манчестер, се надевам дека ќе нè избере токму нас“ вели Зидан.

Засега преговорите се во ќорсокак, бидејќи англискиот тим не сака да му ја исполни оваа желба на Погба и се надеваат дека и фудбалерот и неговиот менаџер Мино Рајола ќе омекнат и ќе ги намалат барањата.

Главоболките на челниците на Манчестер се зголемија откако и голманот Давид Де Геа вчера истакна дека и тој како најдобар голман во Премиер лигата заслужува плата од половина милион фунти неделно.
Англиските медиуми пишуваат дека Манчестер јунајтед нема шанси да им ги исполни желбите и на двајцата играчи, еден ќе биде жртвуван и тоа најверојатно ќе биде Французинот. Англискиот тим е подготвен да го прати Погба во Реал Мадрид доколку во замена ги добие Герет Бејл и Тони Крос.