ПОЕТСКИ ПРЕПЕВ: Песни од Јулијана Величковска објавени во Албанија
Избор од осум песни од стихозбирката „Отворена книга“ („ПНВ Публикации“, 2017) на Јулијана Величковска, заедно со песните на уште шестмина поети: Марам ал-Масри од Сирија/Франција, Јоргос Хронас и Нанси Данели од Грција, Душка Врховац од Србија, Џема Бокардо Клавихо од Шпанија и Здравка Шеиретова од Бугарија, е објавен во книгата „Виножито од чувства“, препеани на албански јазик од Дашамир Мало, во издание на издавачката куќа „Нераида“ од Тирана, Албанија.
– Боите, стилот, мотивите и карактеристиките на секој автор одделно се различни, па се обидов да ги пренесам во еден ваков спој, налик виножито, и се надевам дека со својата страст кон преведувањето успеав да ја доловам естетиката на нивната поезија давајќи ѝ нов живот низ боите, звукот и убавината на албанскиот јазик – објаснува приредувачот и преведувач Дашамир Мало во предговорот кон изданието.
(Текстот е објавен во „Културен печат“ број 22, во печатеното издание на „Слободен печат“ на 14-15 март 2020)