Штипската библиотека „Гоце Делчев” денеска одбележува 18 години од постоењето на Инфо бусот, односно подвижната библиотека, која има за цел книгата да ја доближи, но и да биде достапна за сите граѓани од општините Штип и Карбинци.

Директорот на библиотеката „Гоце Делчев”-Штип, Зоран Костовски вели дека приказната со Инфо бусот почнала во 2003 година, по примерот и добрата пракса во Канада.

-Со Инфо бусот се опфаќаат селата од Општина Карбинци и приградските населби во Штип, а најповеќе се прифатени од читателите за лектирните изданија, од прво до деветто одделение и стручна литература за студенти и во последно време форсираме и земјоделска литература, за земјоделците, вели Костовски.

Инфо бусот денеска беше на Градскиот плоштад „Слобода”, а градоначалникот на Општина Штип, Сашко Николов доби благодарница, бидејќи локалната власт веќе 18 години помага да опстои овој проект. Посочи дека Инфо бусот е успешна приказна, со што книгата е поблиску до секој граѓанин, а овој позитивен проект е презентиран и како успешен и пред македонската, но и светска јавност