Општина Центар почнува да воведува нови сообраќајни решенија на неколку локации на својата територија. Во тек е изведбата на три издигнати пешачки платоа за смирување на сообраќајот што се одвива во зона на детските градинки и општинските основни училишта.

Трите издигнати пешачки платоа, како што информираат од Центар, се изведуваат на улиците „Никола Тримпаре“, „Апостол Гусларот“ и улицата „9 Мај“, во непосредна близина на основното училиште „Јохан Хајнрих Песталоци“, матичниот објект на градинката „13 Ноември“ и клонот „Наум Наумовски Борче“ на градинката „Кочо Рацин“.

– Покрај овие три, дополнително ќе бидат изведени уште шест пешачки платоа, со што ќе се зголеми безбедноста на пешаците и на децата што престојуваат во градинките и посетуваат настава во основните училишта. Покрај изведбата на деветте платоа, Општина Центар на локациите ќе постави нова вертикална и хоризонтална сообраќајна сигнализација – велат од Центар.

Оттаму објаснуваат дека овие зафати се изведуваат со целосна сообраќајна проектна документација, одобрена од СВР Скопје и Град Скопје, како надлежни институции за оваа проблематика.

Изведбата на пешачките платоа ќе биде готова до крајот на оваа година, а поради градежните зафати ќе се изврши и времена измена на сообраќајот. Поради тоа од Општината апелираат  до граѓаните за трпение и разбирање додека траат градежните работи, заради што поскоро завршување на изведбата и пуштање во употреба на издигнатите пешачки платоа.

Општина Центар најавува и ново сообраќајно решение за делот околу трговскиот центар „Буњаковец“. Поради оштетувањата на знаците, по десет години во тој реон ќе се постави нова хоризонтална и вертикална сообраќајна сигнализација.

– Со поставувањето на новиот сообраќаен режим, ќе се олесни движењето на сите учесници во сообраќајот во овој дел од Центар, ќе се подобри ориентацијата и ќе се зголеми безбедноста на пешаците, велосипедистите и корисниците на алтернативните видови на сообраќај – велат од Центар.