Подгответе ги носиите, ќе се избираат зет и невеста
Месната заедница Галичник како организатор на традиционалната манифестација Галичка свадба објавува оглас за избор на зет и невеста за Галичката свадба 2019 година, која ќе се одржи од 12 до 14 јули.
Заинтересираните кандидати за зет и невеста за Галичката свадба, најдоцна до 20.5.2019 година треба да достават мотивациско писмо со фотографии на следната е-маил адреса: [email protected] со назнака „За избор на зет и невеста“.
При изборот предност ќе имаат кандидатите кои се по потекло од Галичник, двајцата или само едниот од нив; претходните години да учествувале како статисти или во друга улога во Галичката свадба; да учествувале во спроведувањето на активностите на Месната заеница; претходно да не се венчани во црква со оглед на тоа дека значаен чин од Галичката свадба е самото венчавање на зетот и невестата во црквата „Свети Петар и Павле“ во Галичник.
Одлуката за избор на зет и невеста ќе ја донесе Советот на Месната заедница Галичник и истата ќе биде објавена до 31.5.2019 на веб страната на Галичник и официјалниот ФБ профил на МЗ Галичник.