Тајландските власти на северозападната граница на земјата денеска се подготвуваат за можен нов прилив на припадници на етничката заедница Карен кои бегаат од нови воздушни напади на војската на Мјанмар.

Војската на Мјанмар ноќеска изврши три воздушни напади во близина на границата со Тајланд под контрола на вооружена етничка група, според хуманитарната организација „Фри Бурма Ренџерс”, која обезбедува локална медицинска и друга помош.

– Можно е едно лице да е повредено во воздушните напади, но нема загинати, изјави претставник на организацијата.

Како што пренесуваат странските агенции, нападите најверојатно се одмазднички за акциите на Националната ослободителна армија Карен, во борбата за поголема автономија, која во саботата нападна и окупира владин воен пункт, при што загинаа десет војници, а повеќе беа заробени.

Во неделата, околу 3.000 луѓе ја преминаа реката што ги дели Мјанмар и Тајланд и влегоа во тајландската провинција Мае Хонг Сонг по два дена воздушни напади.