Почна учебната година во Албанија: Првиот ден во општина Пустец мина без никакви проблеми
Почна новата учебна година во соседна Албанија, а првиот ден мина без никаков проблем во општина Пустец.
– Со почитување на протоколот за хигиенско-санитарни мерки против Ковид-19, одржување на физичка дистанца и носење на заштитни маски, без никаков проблем мина првиот училишен ден. Претходно беше извршена дезинфекција на просториите во сите училишта и во градинката. Почитувањето на мерките ќе продолжи со цел заштита на здравјето на учениците и наставниците, изјавија од општината во која сè уште нема пријавено случај на Ковид-19.
Од таму посочуваат дека во изминатите неколку месеци е целосно реконструирана гимназиската зграда која доби нов лик, со нова опрема во внатрешноста и дидактички средства и помагала.
Во деветте села во општина Пустец настава следат околу 200 ученици од четириесеттина во гимназијата додека останатите во деветтолетките и во нивните подрачни училишта.
Без некои поголеми проблеми и со почитување на протоколите, денеска почна наставата и во сите останати места на територијата на Албанија. За реализација на наставата е одбран комбиниран модел – една седмица со физичко присуство во училница, а една седмица онлајн.