Култниот режисер Жан Лик-Годар почина денеска на 92-годишна возраст, јавија светските медиуми.

Француско-швајцарскиот режисер беше клучна фигура во Новиот бран (Nouvelle Vague) во кинематографијата, движење кое направи револуција во филмот во доцните 50-ти и 60-ти години.

Годар ќе остане запаметен по неговиот навидум импровизиран стил на снимање, како и по неговиот неуморен радикализам.

Роден во Париз во 1930 година, Годар пораснал и се школувал во Нион, на брегот на Женевското езеро во Швајцарија. Враќајќи се во Париз по дипломирањето во 1949 година, Годар пронашол природно живеалиште во интелектуалните „кино-клубови“ кои процветале во француската престолнина по војната и се покажал како столб на францускиот нов бран. По средбата со критичарите Андре Базен и идните колеги-режисери Франсоа Трифо, Клод Шаброл и Жак Ривет, Годар почнал да пишува за нови филмски списанија. Годар уште од самиот почеток имал бунтовничка нота, бранејќи го традиционалното холивудско снимање филмови и промовирајќи ги луѓето како Хауард Хокс и Ото Премингер пред помодерните личности.

Годар исто така го почитувал Хамфри Богарт, кој ќе се појави во неговиот прв долгометражен филм, легендарниот „Без здив“, објавен во 1960 година.