На 85-годишна возраст почина бившиот претседател на Јужна Африка и последен белец кој ја водеше земјата, Фредерик Вилем де Клерк, откако лани му бил дијагностициран рак.

Де Клерк, кој беше претседател од 1989 до 1994 година, имаше клучна улога во демократската транзиција на земјата и ја доби Нобеловата награда за мир во 1993, заедно со Нелсон Мандела. Во 1990, тој објави дека го ослободува Мандела од затвор по 27 години, што водеше кон првите повеќепартиски избори во земјата.

Де Клерк е роден во 1936 во Јоханесбург и работел како адвокат пред да влезе во политиката. Откако бил на повеќе министерски места, во 1989 го презеде водството на Националната партија. Следната година, ја укина забраната за одржување протести и за постоење други партии, вклучувајќи го Африканскиот национален конгрес на Мандела.

Неговите активности помогнаа да се укине апартхејдот во Јужна Африка, но тој останува контроверзна личност и меѓу црното и меѓу белото население.