Виолина направена од италијанскиот творец на инструменти Антонио Страдивари во 18. век ќе биде понудена на аукција следниот месец, со почетна цена од 18 милиони долари.

Конзерваториумот во Њу Ингланд нуди виолина „Јоаким-Ма Страдивариус“ на продажба, а приходите ќе одат за студентски стипендии, исполнувајќи ги желбите на починатиот виолинист и дипломиран НЕЦ, Ма Си-Хон, кој ја донираше виолината на музичкото училиште.

Аукцијата ќе се одржи на 7 февруари во Њујорк, како дел од аукциската недела „Мајсторска недела“, организирана од аукциската куќа „Сотби“.

„Страдивари е како Пикасо од светот на виолините“, изјави за „Ројтерс“ претседателката на компанијата Хелена Њуман.

Пред Си-Хон да стане нејзин сопственик, виолината била во сопственост на виолинистот од 19. век, Џозеф Јоаким, кој бил близок соработник на композиторот Јоханес Брамс.

Виолината ќе биде изложена и во Хонг Конг и во Њујорк пред аукцијата.

Виолините Страдивариус, кои се продаваат за милиони, се познати по својот занаетчиски квалитет, а најбарани се оние од „златниот период“, односно од периодот од 1700 до 1720 година.