Победнички викенд на Македонците: Лазаров меѓу најефикасните против Адемар Леон!
Кузмановски со Магдебург ги освои двата бода на стартот од групната фаза во ЕХФ купот, а Ристовски не беше во составот на Бенфика против данскиот Силкеборг.
Викендов официјално стартуваше групната фаза во ракометниот ЕХФ куп, во првото коло успешно започна екипата на Нант која на домашен терен со резултат 34:28 беше подобра од Абанка Адемар Леон.
Помеѓу најефикасните во победата на францускиот клуб беше македонскиот интернационалец Кирил Лазаров со шест голови, кај неговите тимски колеги подобар учинок имаа само Ривера Фолч (девет) и Мине (седум).
На спротивната страна за шпанската екипа по четири голови доминираа Фернандез Алонсо, Марчан Криадо и Перез Арсе.
Претходно во истата група „Ц“ Магдебург на нашиот Филип Кузмановски славеше против Горење Велење.
Во групата „А“ Бенфика ги освои двата бода во Данска против Бјерингбро/Силкеборг (24:33). Во составот на португалскиот тим не беше нашиот голман Борко Ристовски.