По стар рецепт: Качамак со компири и кајмак
Качамак, бакрдан или бакрданик е вид на традиционално јадење кое воглавно се прави од пченкарно брашно.Ова јадење спаѓа во традиционалните јадења во Македонија, Србија, Црна Гора, Босна и Херцеговина, Бугарија, и Турција. Во качамакот може да се додаваат разни прилози како што се: сирење, месо, пржена свинска маст, пржена сланина, кисело млеко, слатко млеко, шеќер и кајмак.
По стар традиционален рецепт за да се заштеди на брашно, се додава компир, кој се вари до неговото распаѓање и се соединува со брашното во хомогена смеса.
Состојки:
– 1 кг компири
– 0,7 кг пченично брашно тип 500
– 1 лажица маст
– 5 лажици кајмак
– 4 литри вода
Подготовка:
Излупете ги компирите и исечете ги на коцки. Ставете ги во сад со вода убаво да се сварат. Откако ќе се сварат извадете го поголемиот дел од водата во која се варел компирот и оставете само малку на дното и додадете го брашното. Продолжете да ги варите компирите и брашното заедно уште 20 минути.
По 20 минути варење тргнете го садот од оган и убаво испасирајте го компирот со брашното. Потоа додадете ја прво маста и повторно убаво мешајте околу 10 минути, а потоа и кајмакот.
Ова е богат, калоричен оброк кој се служи во помала количина од класичниот качамак.
Добар апетит!