По иницијатива на невладина организација: Русија почна да вакцинира бездомници во Санкт Петербург
Околу 40 бездомници во Санкт Петербург денеска се вакцинирани против ковид-19, соопшти руска невладина организација која ја покрена иницијативата.
– Овде има многу луѓе кои се дел од ризична група и важно е да бидат вакцинирани, наведе организацијата „Ночејка“ која дава помош на бездомници во Санкт Петербург.
Засега, како што додаваат, ќе бидат вакцинирани десетици бездомници. Се проценува дека во Санкт Петербург, град со околу пет милиони жители, има околу 15.000 бездомници.
Вакцинацијата против коронавирус во Русија почна во јануари. Од почетокот на пандемијата до денеска, во земјата се регистрирани 4,16 милиони инфицирани лица со ковид-19 од што досега починаа 83.293 пациенти.