По Чешка, уште две држави се понудија да бидат домаќини на состанокот Бајден-Путин
Финска понуди да биде домаќин на самитот на американскиот и рускиот претседател Џозеф Бајден и Владимир Путин, соопшти денеска финското претседателство, а истото го направи и Австрија.
Финска, која веќе беше домаќин на самитот на поранешниот американски претседател Доналд Трамп и Путин во јули 2018 година, им порача на Вашингтон и Москва дека е подготвена да организира состанок, што ќе биде прва средба меѓу двајцата претседатели, соопшти кабинетот на финскиот претседател Саули Нинисто.
За време на телефонскиот разговор со Путин во вторникот, Бајден понуди самит во трета земја во следните месеци. Кремљ потврди дека поканата пристигнала, но сè уште не соопшти дали ја прифаќа.
Австрија исто така изрази желба да биде домаќин на самит или други средби на високо ниво.
Разговорите за самитот доаѓаат во услови на новите санкции на САД кон Русија.