Деновиве од печат излезе стихозбирката „Слободата чекори гола“ од Марам ал-Масри (Сирија/Франција) во препев од англиски јазик на Јулијана Величковска. Збирката е во издание на „ПНВ Публикации“ и поместена е во едицијата „Гравири“, препознатлива по печатените кјуар-кодови што читателите ги поврзуваат со аудиоснимка направена специјално за ова издание, и на која можат да слушнат како дел од песните застапени во книгата звучат прочитани лично од авторката, на нејзиниот мајчин арапски јазик.

Со песните во стихозбирката, Марам ал-Масри се става во улога на сведок на страдањата на нејзиниот народ во Сирија, давајќи им глас на оние што веќе не можат да зборуваат, артикулирајќи ја за нив и со нив страста за слободата, која е движечката сила во нивната борба за слобода. Ова е книга со прониклив и трогателен звук на тажаленки за сите жртви од таа ужасна војна и за сите неизброени осакатени и мртви.

– Оваа книга е омаж на сите жртви што своите животи ги загубија во бомбардирањата, што беа убиени и измачувани. Исто така е и омаж на сите семејства на кои никаква радост, ниту онаа на победата, не би можела да им ја избрише горчината од загубата на своите сакани – истакнува поетесата Марам ал-Масри, која досега двапати гостувала на Струшките вечери на поезијата, а пред десетина години беше гостинка и на Поетската ноќ во Велестово.

(Текстот е објавен во „Културен печат“ број 89, во печатеното издание на „Слободен печат“ на 17-18 јули 2021)