„ПМГ Џез“ го објави албумот „Фрагменти“ на тапанарот Дино Милосављевиќ
Првиот самостоен албум на тапанарот Дино Милосављевиќ, реализиран во рамките на музичкиот проект „LARTA“, е со наслов „Фрагменти“ (Fragments). Во проектот со свое авторско и изведувачко учество придонесуваат долгогодишните соработници Ѓоко Максимовски – бас, Васко Бојаџиски – саксофон и Владан Дробицки – тромбон, кој воедно се јавува и како продуцент на изданието.
Проектот „LARTA: Fragments“ е објавен како 38. издание на етикетата „ПМГ Џез“. Наскоро ќе следи промоција на изданието во Скопје. Снимањето на албумот е поддржано од Министерството за култура на РСМ.
Дејан (Дино) Милосављевиќ е еден од најистакнатите тапанари во земјава и на Балканот. Активен е на музичката сцена од почетокот на 90-тите години. Бил дел од Влатко Стефановски Трио цели 19 години. Соработува и со врвни и познати артисти, како Кирил Џајковски, Калиопи, Стефан Миленковиќ, Теодосиј Спасов, Јан Акерман, „Анастасија“, „Мугер Фугер“, Стен Скиби, Раде Шербеџија, Бајага, Зоран Предин, Џибони, Владо Јаневски, Владимир Василевски – Четкар, „Ласт експедишн“, Каролина Гочева, „Меморија“, Игор Џамбазов Бенд, „Суперхикс“ и други.
Неговото артистичко умеење особено доаѓа до израз на албумите на „Сетстат“ (Sethstat), „Кабадајас“ (Kabadayas), „Беневентан трио“ (Beneventan trio), „Инфјуз“ (Infuse) и „Алшар“, проект на Никола Коџабашија.
Дејан Милосављевиќ е еден од основачите на „Skopje Drum Talks“, првото здружение за едукација и поддршка на тапанари во Македонија, кое веќе три години организира јавни настани поврзани со уметноста на овој инструмент.
(Текстот е објавен во „Културен печат“ број 156, во печатеното издание на весникот „Слободен печат“ на 26-27 ноември 2022)