Дискографската куќа „ПМГ Џез“ ја заокружи иницијативата „5Џ“, во чии рамки беа промовирани пет нови албумски изданија со современа македонска џез-музика. Секој петок од 17 април до 15 мај беше промовирано по едно издание, со што „ПМГ Џез“ веќе има 15-ина џез-албуми во својата дискографска колекција.

– Фразата „Нов бран“ е повторно актуелна во македонското музичко секојдневие, но овој пат е фокусирана на вибрантната млада џез-сцена, која полека се открива со целата своја раскош, квалитет и автентичност. Нашата земја е преполна со музички таленти и луѓе со сјајни идеи, само е потребно некој тоа да го регистрира и да го изнесе на виделина – велат од „ПМГ Џез“.

Македонската дискографија е збогатена со нови извонредни албуми на Јордан Костов квинтет, групите „Светлост“, „Сетстат“ и Мирко Попов (албум снимен во живо), „СД4“ и „Кобалт код јунит“. Покрај интересот за објавување албуми со џез-музика, од „ПМГ Џез“ најавуваат и нов џез-фестивал, чија реализација во овој период е спречена од коронавирусот.

(Текстот е објавен во „Културен печат“ број 31, во печатеното издание на „Слободен печат“ на 16-17 мај 2020)