Во седиштето на ХДЗ се одржа заедничка седница на Претседателството и на Националниот совет на партијата преку видеолинк. По неа, премиерот Андреј Пленковиќ, во изјава за медиумите, меѓу другото, се осврна и на случајот со кафулето во Риека.

– Не сакам да водам полемика со сопственикот на „Три мајмуни“, рече Пленковиќ и повтори дека неговата порака оти членови на ХДЗ-овци не се добредојдени во локалот е фашистичка и расистичка.

– Да се забранува некому да влезе некаде е нешто друго. Ова не е прашање на место или на град во кој се случило, туку е прашање на порака, порача хрватскиот премиер.

Ова, според него, е јасен пример кој добива оддек во јавноста преку медиумите.

– И што да правиме сега? – Да молчиме на тоа? – Кој е нареден чекор? – Прво пукаме, потоа не пуштаме во кафулиња, што е трет чекор? – Кога некој ќе отиде на прошетка да добие даска по глава? – Тоа не може. Работоте мора да ги нарекуваме онакви какви што се. Ова е шовинизам и расизам. Кој е следен чекор, можете и сами да заклучите, додаде Пленковиќ.

Градоначалникот на Риека, Оберснел во отворено писмо до премиерот Пленковиќ напиша дека погрешна објава на еден угостител на социјалните мрежи што е веќе осудена од релевантната политика, „не е нешто за што се очекува реакција од премиерот каква што демонстрирал денеска“.

– Ако господинот од тие „Три мајмуни“ рекол „во локалот не може Срби, не смеат да дојдат Евреи, Роми, припадници на Армада, СДП-овци, ќе се дигнеше таква врева од која ќе ечеше цела Хрватска. Но, ако се рече „не можат ХДЗ-овци, тоа не е ништо“. Дури се бараат и оправдувања. Тоа се нарекува дискриминација, расизам, а нареден чекор е фашизам, беше реакцијата на Пленковиќ.

–  Во Риека нема ниту расизам, ниту фашизам во моделот во кој го прикажувате, му одговори Оберснел.