План на Меркел и Макрон – регионален собир за решение на косовското прашање
Планот и идејата на францускиот претседател Емануел Макрон и германската канцеларка Ангела Меркел е да се направи регионален собир околу прашањето за Косово и да започнат интензивни преговори на Србите и Албанците – истакна вчера српскиот претседател Александар Вучиќ, по состанокот со германската канцеларка на маргините на генералното собрание на Обединетите нации (ОН), објави „Блиц“.
Тој додаде дека нема сомнение дека Европа сака решение на спорот меѓу Белград и Приштина и дека Германија инсистира на тоа.
Ангела Меркел, според Вучиќ, е голем лидер и тоа го покажува со вниманието кое го посветува на помалите земји, но и дека Европа е нејзин проект и дека сака стабилност на долг рок.
– Затоа таа цел свој труд ќе го вложи за да ја зачува стабилноста и ќе бара разговори, сѐ додека не пронајдеме решение – посочи српскиот лидер.
Александар Вучиќ додаде дека определеноста на канцеларката Меркел е забрзување на решенијата за Балканот.
– Германија сака стабилност и од нас бара да разговараме и да најдеме решение – рече Вучиќ.
Тој истакна дека разговарале и за одредени економски проекти и дека тој се пожалил поради тоа што „Фоклсваген“ отишол во Турција. Меркел му одговорила дека и бугарскиот премиер се пожалил поради истата причина, на што Вучиќ бил дециден и образложил дека верува дека Србија ќе успее да се избори за нови германски инвестиции.